第一天旅程回顧
機場篇晨早10:15，爸爸載我們到達香港機場，超快！趕快吃完麥記早餐，1205前就趕快去23號登機閘口等上機。1時正，算好準時起飛架啦！原來航程只有1小時5分鐘，上到飛機好快就派飛機餐，食完機長就話好快就會降落高雄小港機場(果陣1340) ，快到呢！1410就到左小港啦！
我們的難題：
- 落地簽證原來要NT$200架，我地身上無台幣…
- 未出境果度係冇銀行架，只有1間冇$唱既免稅店…
=>好彩免稅店個阿姐自己唱俾我地，1:4，換左400大元 - 有人忘了把行李鎖匙帶在身…
=>搵機場D海關叔叔幫手開，開完個鎖仲用得喎！勁~ - 哪裡有手機電話咭呢？
=>顧客服務部話三樓有，但無開，叫我地出市區搵 - 哪裡搭公車？
=>指示牌不足，搵左好耐先知一個唔似係站既站響出面
到步篇
大概三時左右，找左好耐先找到公車站，等車既時候有位年輕人走過來「兜」生意，原來係的士司機來的，去統茂NT$300，雖然比公車貴，但都可以接受，又舒舒服服，的士就的士啦！在統茂安頓好，休息一會，四點鐘我地就出發到「鼓山渡輪站」，在地圖上看似很近的地方，點知我地足足花了1小時40分鐘才到達，因為…迷路啦！街上又冇乜人俾我地問，經過漁人碼頭、走入民居，問過好心既大姐，辛辛苦苦終於到了！
旗津篇
近六點，千辛萬苦上了鼓山渡輪，已是近黃昏啦！到左旗津，由於日落時分，我地冇上燈塔同炮台，就往廟前路遊覽，經過天后宮，吃了些小食，之後去左旗津海水浴場，D沙係黑色架，好得意！在海鮮街品嚐了幾道海鮮，湊湊熱鬧，服務就麻麻地啦，不過味道幾鮮美既！八時左右，回到鼓山渡輪站找公車，又找了好久，坐車到六合夜市，司機話轉彎落，點知轉左彎落行得仲遠…
六合夜市篇
九點鐘，到了六合夜市，原來六合夜市唔係好大，好快我地就行完又行，買了些便宜的東西，食左D小食就返酒店了！行番酒店…行呀行…都用左成半小時，一點都不近啊！
| 今日食左乜 | 響邊度食 | 幾錢呢 | 好唔好食架 |
|
胡椒餅 |
旗津 | NT$25 | 內裏係香香既豬肉，雖然有D蔥既物體，但總括來說都幾好味，下次去台北一定要吃正宗的。 |
| 珍珠奶茶 | 旗津 | NT$20 | 好難飲，奶茶唔似奶茶，D珍珠好唔得 |
|
白灼海蝦 |
旗津-鴨角活海產 |
NT$100 | 好鮮味，好爽口！ |
|
炒蜆 |
旗津-鴨角活海產 |
NT$200 | 用一D像甜醋的汁炒，未試過，但味道都唔錯 |
|
白灼螺 |
旗津-鴨角活海產 |
NT$240 | 冇乜內臟，超爽口，值得推介，雖然白灼的，但能帶出鮮味，幾好幾好！ |
| 香腸 | 六合夜市 | NT$35 | 好油，麻麻地 |
|
花枝丸+雞肉熱狗 |
六合夜市 | 合共NT$50 | 外面包著一層甜甜的面粉，花枝丸OK，雞肉腸就麻麻了 |
第二天旅程回顧
關子嶺篇晨早八點，一改行程出發到關子嶺，本來諗住乘搭的士轉火車再轉公車，但計過條數，直接坐的士都係NT$1100(酒店到高雄火車站都要NT$85)，又可以慳返D時間，差不多2小時就到左關子嶺啦！(0950)，由於有統茂既折價券，司機大姐又說這裡的溫泉較新，就選左呢間啦，原來平日價都只是NT$300，包1杯飲品，我地張折價券就定價NT$500，半價，即係兩個人就係NT$550囉！都幾抵！呢個溫泉裏面有四個池，包括按摩溫泉、玫瑰精油冷泉、噴水按摩冷泉同埋呢度獨有既泥漿溫泉，最鍾意玫瑰冷泉，勁香；泥漿果個就係先將泥漿塗在身上和面上，等佢乾左我地就落去浸啦，浸完泥漿溫泉皮膚滑滑，真係好好好正啊！泡完溫泉，一點半左右，本來想食埋野先離開關子嶺的，但去到公車站剛巧有車(班次好疏架)，就落左山先，去到新營都冇乜野食，咁橋14:22又有火車，去到台南先囉！
台南篇
三點鐘，終於到左台南火車站，先買些雞排同珍珠奶茶頂頂肚先，由於趕時間既關係，我地又選左最快捷既方法—搭的士，一路搭車一路食野飲野，成三點先食野，好少可啊！
億載金城篇
時近四點，由於億載金城、安平古堡等景點位於近郊，所以都經過左幾多條街先去到，拍拍照，走了一圈我地就要離開，本來想到對面幾出名既伍角船板餐廳試試，但要趕響安平古堡關門前到達，就坐的士離開億載金城了！
安平古堡篇
今天我地做左富豪，出入景點都搭的士，哈哈！冇辦法，天氣實在太熱了，這裏的交通又不太方便，遊覽安平古堡，地方不是太大，除左主要展館外，毗鄰有舊台灣城牆遺跡，影左好多相，又出發到赤嵌樓。由於我地身處郊區，當然坐的士返市區啦，又遇到之前載我地由億載金城過來的司機，真巧！
赤嵌樓篇
由於赤嵌樓21:00先關門，所以我地最後先黎呢度，又因為順路關係，去完郊區先返黎，因為可以走路到火車站；這時天還未黑，又可以勁影相，遠看都幾靚，個天又好藍；之後入左裏面看看，其實都係介紹下D古蹟歷史咁。大概六點吧，我地遊完赤嵌樓就到旁邊的度小月擔仔麵食野，好餓啊！雖然呢間只係分店，但味道都OK(因為我地唔知正宗有幾好味)，但比起夜市果D，我諗好D既。
回程篇
七點左右，我地食完擔仔麵就慢步回火車站勒，這裏的街道比高雄的多人，店鋪亦較多，走呀走，原來都行左好耐，途中見到有間黑橋牌，就入左去買左D野食；沿途我又搜購左好多旅遊書，好開心啊！坐自強號回高雄，未夠2100就到了火車站打電話，肚子又餓了，為免出面唔知邊度有食野，所以是旦響火車站既餐廳食左D野，我點左一個豬排套餐，似乎除左豬排，我好似成份餐都唔係好鍾意食…買了些東西就走了！最搞笑係的士大哥既唔老實手法，被我反串，勁！雖然後來落錯車，但憑我既超級方向感，順利抵達酒店，YEAH~
| 今日食左乜 | 響邊度食 | 幾錢呢 | 好唔好食架 |
|
香酥雞排 |
台南火車站 | NT$40 | D雞好滑，味道很香，唔錯唔錯！ |
| 珍珠奶茶 | 台南火車站 | NT$25 | 好大杯，今次D味好好多，D珍珠又幾好食，有台北的水準！ |
| 度小月擔仔麵 | 赤嵌樓旁 | NT$60 | 份量不多，味道也不錯，最衰有芫茜！ |
| 豬排套餐 | 高雄火車站 | NT$120 | 整體麻麻地，D配菜唔啱食，豬排尚可，D飯加左肉燥，都OK既。 |
